NEMC yakunjua makucha, yakitoza faini kiwanda cha kuzalisha mifuko mbadala.

Na Isdory Njavike Dar es salaam

Baraza la Taifa la Uhifadhi na Usimamizi wa Mazingira (NEMC) limekipiga faini ya shilingi milioni 35 kiwanda Cha kuzalisha mifuko mbadala cha Al-Haseeb Jewellery Limited kwa makosa mbalimbali likiwemo la kuzalisha mifuko mbadala iliyo chini ya kiwango cha 70gsm.

Akizungumza na waandishi wa habari katika ziara ya siku moja katika kiwanda hicho kilichopo jijini Dar es Salaam Mkurugenzi Mkuu wa NEMC Dkt. Samuel Gwamaka akiwa ameambatana na Mkurugenzi Mkuu  wa Shirika la Viwango Tanzania (TBS) Dkt. Ngenya Athuman alisema uzalishaji wa mifuko mbadala iliyo chini ya kiwango imekua changamoto kubwa kwa Baraza pamoja na wafanyabiashara wa mifuko hiyo wanaofuata sheria na taratibu zilizopo.

Alisema viwanda kama cha Al-Haseeb Jewellery ni moja ya vikwazo vinavyorudisha nyuma juhudi za Rais Dkt. John Pombe Magufuli katika kutekeleza azma ya Serikali ya ujenzi wa viwanda na uchumi wa kati ifikapo 2025.

"Tumepata malalamiko mengi kutoka kwa wafanyabiashara wanaofuata sheria kuwa sokoni mifuko yenye kiwango cha 70gsm haiuziki, na tulipofanya uchunguzi tukagundua uwepo wa wazalishaji kama hawa ambao wamejaza sokoni mifuko isiyokidhi vigezo, huu ni uhujumu wa uchumi kwa taifa,” alisema Bw. Gwamaka.  

Dkt. Gwamaka aliyataja makosa ambayo kiwanda hicho inakabiliana nayo kuwa ni pamoja na kuzalisha mifuko mbadala zaidi ya milioni mbili iliyochini ya kiwango na kupigwa faini ya milioni 20, kufanya uzalishaji bila kufanya tathmini ya athari kwa mazingira (EIA) ambapo faini yake ni milioni 10 pamoja na milioni 5 kwa kusambaza mifuko hiyo katika masoko mbalimbali.

"Fuateni sheria zilizopo kinyume na hapo madhara yake ni makubwa. Ninawaonya wamiliki wengine wa viwanda visivyofuata sheria kufuata sheria kwani mpango wa NEMC ni kuwabaini wote wanaoendesha viwanda kinyume na utaratibu. Nia yetu ni kulinda viwanda vya ndani vinavyofuata sheria ili kuweza kutimizia azma ya serikali ya awamu ya tano ya kuwa nchi ya uchumi wa Kati na viwanda ifikapo mwaka 2025," Dkt. Gwamaka alisisitiza

Hata hivyo Dkt. Gwamaka aliongeza kuwa tayari Kuna baadhi ya wafanyabiashara wanaouza mifuko hiyo chini ya kiwango wameshakamatwa na watafunguliwa mashtaka. Aliomba wananchi kuendelea kutoa ushirikiano kwa kuripoti mambo yote yanayohusiana na uvunjifu wa sheria ya Mazingira na wao watafanyia kazi taarifa hizo.

Kwa upande wake Mkurugenzi Mkuu  wa (TBS) Dkt. Athuman amesema shirika lake halitakuwa na huruma dhidi ya wenye viwanda ambao wamekuwa wakizalisha bidhaa zao chini ya kiwango na wataendelea kuchukua hatua za kisheria.

"Hatuwezi kuchekea vitendo Kama hivi vinavyorudisha juhudi za rais wa nchi yetu, tumejipanga vizuri na tutapambana na kila mtu anaekiuka taratibu zilizopo atashughulikiwa kwa mujibu wa sharia,” alisema Dkt. Athuman.

MWISHO.